حل صعوبات النحو

دائما ما يشتكي أبنائنا من النحو كجزء أساس من مادة اللغة العربية ودائما يعجزوا عن حل أسئلته في الإمتحان وقد يصل بهم الأمر لترك سؤال النحو
ولهذا السبب أرجو التركيز معي في ذلك المقال

العملية سهلة وبسيطة جدا يلا بينا:

الكلام ال بنقراه في أي كتاب أو مقال عبارة عن ثلاث أقسام ،يبقي أي كلمة في الدنيا ليها تصنيف من التلاتة دول

١- اسم
٢- فعل
٣- حرف

أول حاجة الاسم ،ودا ليه علامات
لو جبتلك كلمة وقولتلك الكلمة دي نوعها ايه ،لو بصيت كويس علي الكلمة .. بص كدا ، لا .. بص تاني
لو :
١-في اولها ال (العلم ) .
٢- آخرها تاء مربوطة (كراسة).
٣- بها تنوين (قلما).
٤- اسم انسان أو حيوان أو بلد أو اسم إشارة(هذا ،هذه،هؤلاء)،أو اسم موصول (الذي ،التي)،أو أي ضمير مخاطبة أو متكلم .

طيب أنا جت قدامي الكلمة ولا فيها
ال ولا أخرها ة ولا هي اسم انسان ولا حيوان ولا بلد ولا إشارة ولا موصول ولا ضمير

ومطلوب مني أعرف نوعها أعمل ايه؟؟؟؟؟

بكل بساطة أجبلها(ال ) من عندي والزقه قدامها

ازاي؟؟؟

لو قولتلك حدد نوع الكلمة ( منهج)؟؟

يا تري انتي اسم ولا ايه

مفيش ال فيها ولا ة

زودلها(ال)

بقت ايه ؟؟

المنهج
شاطر تمام انطق كدا

المنهج ،الكلمة مشت معاك وقبلت ال

اقولها مبروك أنتي اسم

تمرين :
حدد أي هذه الكلمات اسم:
هذا – رجل – علم – باسل – ينام – أسد – حصان – يأكل – يشرب.

٢- الفعل :
عرفنا ازاي نعرف الاسم ،دلوقتي جه دور الفعل
يعني ايه فعل؟؟؟
حدث ،حاجة بتحصل او حصلت أو هتحصل
تمام
يبقي الفعل ٣ أنواع :
١- مضارع : يدل علي حدث يحدث الآن مثل: يشرح.
٢- ماض: حدث انتهي مثل: شرح.
٣- أمر : بتأمر حد بفعل شئ مثل : اشرح.
الفعل المضارع مؤقتا كدا بنقول عليه مرفوع وعلامة رفعه الضمة ،ولازم يبدأ بحرف من حروف أنيت
أشرح ،نشرح،يشرح،تشرح
أما الماضي مبني علي الفتح ،زي واحنا صغيرين شرح ،زرع
والفعل الأمر مبني علي السكون
لاحظ الحرف الساكن
اش رح

تالت قسم معايا هو الحرف
الحرف ملهوش معني الا مع غيره
يعني لما أقول
في
عن
فهمت حاجة؟
طبعا لا
يبقي دي حروف ،منها حروف جر زي : من ،إلي ،عن ،علي ،في ،الباء ،الكاف،اللام
وحروف عطف :و ،ف ،ثم.

الخلاصة:
لو عندنا كلمة مش عارفين نوعها نعمل ايه؟
١- نحطلها ال
٢- قبلت اسم
٣- لم تقبل فعل
٤- والحرف معروف

-تمرين:
حدد نوع الآتي :
يلعب – حلم – في – حظ
يلعب : ال =اليلعب منفعتش يبقي فعل.
حلم: ال = الحلم ،نفعت.يبقي اسم .
حظ : ال = الحظ ،نفعت يبقي اسم.
وفي : حرف جر ليس له معني الا مع غيره.